(警告﹕《時事發噏風》開宗明義「發噏風」﹐任何憂國之士﹑衛道之士﹐如睇後有任何不適﹑不安跡象﹐請自行了斷)
各位花生友﹐可能你地同我一樣﹐係呢個禮拜之前﹐對於甘乃威呢個名字﹐基本上係識佢老鼠﹗
不過﹐經過今個禮拜﹐大家睇完幾場大龍鳳之後﹐相信大家都會對佢﹑同民主黨D爆笑演出﹐印象難忘﹗
今日﹐我可以大大聲講﹕
甘乃威﹐你呢鑊飲晒奶西啦﹗快D落台啦﹗
換言之﹐經傳媒一番「審訊」過後﹐甘乃威求愛不遂﹑老羞成怒炒助理王麗珠一案﹐已經罪名成立。
只不過﹐呢個並唔係我認為甘乃威需要落台嘅成因。
因為即使係咁﹐都唔足以證明﹐甘乃威炒條女﹐係因為自己求愛不遂而老羞成怒。
此外﹐就算甘乃威真係因為求愛不遂﹐所以老羞成怒炒條女﹐我都唔認為甘乃威需要落台。
如果所謂「上司因向下屬求愛不遂而將其解僱」﹐係屬於性騷擾的話﹐excuse me﹐呢件事應該交比警察去查﹐查完之後將交比法庭判囉﹖判到係性騷擾罪成立﹐甘乃威就自動無得做垃圾會議員啦﹖
甘乃威需要落台﹐原因係佢太白痴﹗佢唔單只無政治智慧﹐連基本智慧都無。
成件事﹐甘乃威以及佢所屬嘅民主黨﹐都處理得異常白痴﹗白痴到可以唔可以用筆墨來形容﹗
白痴罪狀(1)
首先﹐我唔理甘乃威有無講大話...唔該﹐當件事爆出來﹐就好應該係開記者招待會之前﹐即日同條女講掂數﹐老作一個好理由﹗
換言之﹐無論甘乃威係咪真係因為求愛不遂炒條女﹐你都要講大話﹐老作一個解僱原因。
老作一個好理由﹐其實好容易﹐甚至可以自己認下衰仔﹐例如話當日炒對方﹐係原於誤會對方犯錯﹐事後發現對方無做錯﹐其實已經好後悔...
呢個理由﹐最好係已經同條女夾定口供﹐最好就請埋條女出記招﹐一齊講﹐就乜都搞得掂啦﹖
總之﹐你開得記者招待會﹐你要洗清自己唔係「因求愛不遂而將其解僱」﹐就一定要作定個理由﹗哪怕係個假理由﹐都一定要有個理由﹗
你無解釋個解僱理由﹐走去開記者招待會﹐就真係多舊魚啦﹖
白痴罪狀(2)
甘乃威開得記招﹐唔該﹐你同出席所有人士事先傾掂啦﹖出席記招D人﹐梗係要夾定晒家嘛﹖
有乜理由﹐你自己否認﹐到問民主黨主席何俊仁﹐條友竟然可以答﹕「既唔否認﹐亦唔承認」呀﹖
有乜理由﹐記者問何俊仁信唔信甘乃威﹐條友竟然可以答﹕「我信唔信唔係問題」呀﹖
有乜理由﹐你帶自己個老婆出來﹐個老婆一直粒聲唔出呀﹖
大佬﹐咁搞法﹐咪仲令人有更多疑團﹐咁你開來把托咩﹖
白痴罪狀(3)
甘乃威既然開過記招﹐否認自己唔係因為求愛不遂炒條女﹐又唔認自己曾經向對方求愛啦﹖唔該﹐即使你係講大話都好﹐唔該﹐請你死撐落去啦﹗
講大話﹐一係唔講﹐一係就講到底﹗我理得傳媒點報呀﹖理得譚香文點講呀﹖你都一律話對方老作﹐甚至應該惡人先告狀﹐民事控告對方誹謗呀嘛﹖
講大話大忌﹐係不打自招﹗垃圾會既然未開獨立調查﹐你就一於否認到底﹐有乜奶油未審訊﹐先自爆呀﹖就算係要搞到整獨立調查﹐都繼續唔認呀嘛﹖
大佬﹐你呢招不打自招﹐真係仲衰過一開始認﹗
你認﹐最多都係私生活唔檢點呀﹖到時來場大龍鳳﹐來過跪係老婆面前痛哭認錯﹐再來過老婆原諒互相擁吻﹐然後老婆力撐老公﹐懇求公眾原諒﹐就very good啦﹖
你最初又唔認﹐比傳媒報一大輪﹐你又認自己「有好感」﹐搞到前言不對後語﹐誠信原本未破產﹐搞到即時破產﹗
原本系私德有問題﹐而家搞到誠信出問題﹐你仲邊有得留低呀﹖
白痴罪狀(4)
甘乃威係電臺話﹕「講過對她（女助理）有好感，但我想強調不存在示愛，我沒追求過，沒做過任何行動，沒有送花追求」。
同對方表示有好感﹐唔係示愛係咩﹖叫通知呀﹖陳述客觀事實呀﹖披露事實真相呀﹖
大佬﹐你自己白痴好啦﹐唔好當市民白痴先得呀﹖
係人都知﹐向對方表示好感﹐就已經係調情(flirting)嘅一種﹐距離正式表白已經唔遠。如果咁都唔算係示愛﹐咩算係示愛呀﹖
你不打自招已經蠢啦﹐你仲要狡辯﹐仲要狡辯得咁低B﹖你低B成咁﹐仲邊有得留低呀﹖
白痴罪狀(5)
呢個係最白痴嘅問題﹗一個男人﹐幾十歲人﹐竟然唔知道「係度食﹐唔好係都疴」﹐真係白痴得緊要﹗
即使係一個打工仔﹐都知道「係度食﹐唔好係都疴」﹐你在自己工作環境度溝女﹐無事就好地地﹐散咗面左左﹐甚至對方因愛成恨玩報復﹐真係後患無窮﹗
更大鑊係﹐你唔係溝女呀﹗你家陣係偷食呀﹗
即使條女幾索﹐條女幾正都好﹐你即使對對方再有好感好﹐都應該用理智刻制住。因為﹐你第日仲要搵食㗎﹖
條友竟然係自己個竇口偷食﹖你實在太叻啦﹗即使條女受你溝﹐今次事件無發生﹐他日如果感情出問題﹐either係你老婆定條女都好﹐甘乃威一樣大檸樂﹗
你話﹐白痴成咁﹐仲邊有資格做議員﹖
我成日話﹐政治從來都係由無數謊言堆砌而成。由競選口號﹐乃至所謂政治消息﹐當中都有無數謊言。所謂政治公關﹐功能就係不斷去製造美麗謊言。
換言之﹐識得講大話﹐係一個政治人物嘅基本要求。
要甘乃威落台﹐唔係因為條友講大話﹐而係條友唔單只講大話﹐仲唔識講大話﹐仲要偷食都偷食得白痴過人﹗
下台啦﹐甘乃威﹗垃圾會已經好白痴啦﹐我地唔需要再多一個白痴﹗
